Մադրիդի «Ռեալի» գլխավոր մարզիչ Ժոզե Մոուրինյոն հայտարարել է, որ ապագայում նա մտադիր է վերադառնալ «Ինտեր»' հավելելով, որ չի պատրաստվում լքել «Սանտյագո Բերնաբեուն» մինչև իր ընթացիկ պայմանագրի ավարտը:

 

Հիշեցնենք, որ պորտուգալացի մասնագետը լքեց «ներաձուրիներին» 2010թ. ամռանը' Չեմպիոնների լիգան նվաճելուց հետո, սակայն մինչև հիմա ջերմ զգացողությունների են մնացել Ա սերիայի հանդեպ:

 

«Ես «Ինտերի» մեծ երկրպագուն եմ: Ակումբն իմ տունն է, և ես մի օր անպայման կվերադառնամ: Ե՞րբ: Այս պահին իմ ապագայի մասին հստակ ոչինչ ասել չեմ կարող: Ես դեռ երկու տարվա գործող պայմանագիր ունեմ «Ռեալի» հետ և երբեք չեմ ասել, որ պատրաստվում եմ հեռանալ:

 

Վերջին 10 տարում ոչ ոք այնքան շատ տիտղոսներ չի նվաճել, որքան ես: Միշտ հաղթել հնարավոր չէ, բայց երբ դու դա պարբերաբար ես անում, պատմություն ես ստեղծում:

 Մարդիկ չեն հիշում, թե ինչ է կատարվել, նրանք միայն հիշում են, թե ով է հաղթել: Այնպես որ, եթե հաղթելու հնարավորություն ունես, պետք է օգտագործես այն»,-Մոուրինյոյի խոսքերն է մեջբերում Goal.com-ը:

 

49-ամյա պորտուգալացին, ով ֆուտբոլի պատմության մեջ ամենահաջողակ մարզիչներից է, երազում է նորանոր մրցանակներ շահել:

 

«Ես երեք նպատակ ունեմ: Ուզում եմ լինել առաջին մարզիչը, ով երեք տարբեր թիմերի հետ նվաճել է Չեմպիոնների լիգան: Ինչպես նաև ցանկանում եմ հաղթել երեք առաջատար երկրների առաջնությունը' Անգլիա, Իտալիա և Իսպանիա:

 

Եվ առաջիկա տարիներին կցանկանայի լինել առաջինը, ով Պորտուգալիայի հավաքականի հետ ինչ-որ բան է նվաճել»,-եզրափակել է Մոուրինյոն:

armsport.am