Այսօր Մյունխենի «Ալյանց Արենա» մարզադաշտում Մյունխենի «Բավարիան» ՉԼ կիսաեզրափակիչում ընդունել է Մադրիդի «Ռեալին»: Խաղից առաջ մի փոքր վիճակագրություն թիմերի միջեւ հանդիպումների վերաբերյալ:

Մյունխենի «Բավարիան» եւ Մադրիդի «Ռեալը» Չեմպիոնների լիգայի խաղարկությունում հանդիպել են 18 անգամ, որից 2-ը՝ խմբային մրցաշարում:

«Բավարիան» հաղթել է 10 անգամ, «Ռեալը»՝ 6, 2 խաղ էլ ոչ-ոքի է ավարտվել:

Միմյանց դեմ խաղերում գոլային առավելությունը «Բավարիայի» կողմն է՝ 30։23:

Թիմերի միջեւ հանդիպումներում ամենաարագ գոլի հեղինակը Ռոյ Մակայն է «Բավարիայից»: 2007 մարտի 7-ին ՉԼ 1/8 եզրափակիչում հոլանդացին մադրիդցիների դարպասը գրավել է 10-րդ վայրկյանին:

Միմյանց դեմ խաղերում լավագույն ռմբարկուն բրազիլացի Ջովանի Էլբերն է, ով 5 անգամ գրավել է «Ռեալի» դարպասը:

Մադրիդի «Ռեալը» ՉԼ 1997/1998թթ խաղարկությունը հաղթել է «Բավարիայի» ներկայիս գլխավոր մարզիչ Յուպ Հայնկեսնի գլխավորությամբ:

«Ռեալը» Մյունխենում երբեք հաղթանակ չի տարել «Բավարիայի» նկատմամբ՝ 8 պարտություն, 1 ոչ-ոքի:

Վիճակագրությունը ցույց է տալիս, որ բացառությամբ 1976թ․-ի, փլեյ-օֆֆ փուլում զույգ տարիներին հաղթում է Մադրիդի Ռեալը (1988, 2000, 2002, 2004), իսկ կենտերին՝ «Բավարիան» (1987, 2001, 2007):

1999/2000թթ․ խաղարկության 2-րդ խմբային փուլում «Բավարիան» 2 անգամ առավելության է հասել 4-2 եւ 4-1 հաշիվներով, իսկ արդեն կիսաեզրափակիչում հաղթել է «Ռեալը»՝ 2։0, 1։2: «Ռեալին» եզրափակիչ դուրս բերեց Նիկոլա Անելկան, ով 2 խաղում դարձավ 2 գոլի հեղինակ: Հատկանշական է, որ Անելկան այդ ժամանակ շատ վատ հարաբերությունների մեջ էր գտնվում թիմի գրեթե բոլոր խաղացողների հետ եւ մրցաշրջանի ավարտից հետո հեռացավ թիմից: