«Ռեալը» շարունակում է երկարաձգել պայմանագրերը թիմի առանցքային ֆուտբոլիստների հետ: Արբելոան, Դի Մարիան և Ալբիոլը արդեն երկարաձգել են իրենց պայմանագրերը, իսկ Իգուաինը շատ մոտ է դրան: Հերթը հիմնական կազմի երկու առանցքային ֆուտբոլիստներինն է՝ Ալոնսոյինը և Ռոնալդուինը, հաղորդում է Marca-ն:

Դեռ անցած ամսվա սկզբներին Մոուրինյոն դիմել էր ակումբի ղեկավարությանը, որպեսզի երկարաձգեին իսպանացու պայմանագիրը, որը ավարտվում է 2014 թվականին: Չնայած այն հանգամանքին, որ Ալոնսոն արդեն 30 տարեկան է, Մոուրինյոն ցանկանում է, որ նա թիմում մնա առնվազն մինչև 2016 թվականը:

Ռոնալդուի պայմանագրի երկարաձգման հարցում մի շարք խոչընդոտներ կան: Ինքը՝ Ռոնալդուն ցանկանում է մնալ թիմում, սակայն դրա հետ մեկտեղ ցանկանում է, որպեսզի բարձրացնեն իր աշխատավարձը: 

Ակումբի ղեկավարները հիմա քննարկում են ֆուտբոլիստի աշխատավարձը բարձրացնելու՝ մինչև 15 մլն եվրո հասցնելու տարբերակը:

Նշենք, որ Ռոնալդուն այժմ ստանում է տարեկան 12 մլն եվրո: